ـــجــــــــاربــــــنــــــــــا
--------------------
تفريق المعاملة ...
-------------------

النهاردة هنحكى عن تجربة جديدة وهى تفريق المعاملة بين الاخوة
بس انا عايزة اسأل سؤال ؟؟
ايه احساسك لما تلاقى اخوك اوختك مميزين عنك فى كل حاجة ..دراستك .. لبسك .. اصحابك
السؤال ده بقى هيجاوبوا عليه بطلة تجربتنا انهاردة وهى
سهر واخوتها الاتنين امير و فريدة
سهر هى الوسط بين اخواتها ... امير اكبر منها بسنتين .. وفريدة اصغر منها بسبع سنين

سهر بتراعي ظروف باباها ومش بتطلب حاجة غير للضرورة .. لكن اخواتها الاتنين كل اما يشوفوا باباهم يطلبوا منه فلوس لأى حاجة .. المهم ياخدوا منه فلوس وخلاص كل اما يجى عيد ميلاد امير ولا بداية المدارس ولابداية الامتحانات ولا بداية الاعياد بنزل يجيب لبس وجزم كتير مع انه هو بيبقى لسة جايب وسهر يدوب عندها 5 اطقم بتخرج بيهم وبتروح الدروس بيهم وجزمة وصندل وشنطة وعلى الكام طقم دول مامتها تقعد تقول لها انتى مش مهتمة بنفسك ليه انتى مش شايفة البنات بيبقوا عاملين ازاى انتى مش شايفة اخوكى اللى هو ولد عامل ازاى .. بس اول ما تطلب فلوس عشان تجيب اى حاجة .. انتى مش حاسة بينا . احنا هنقطع نفسنا .. انتى معندكيش دم ولا احساس .. هيا ذنبها ايه ؟؟؟... المفروض انها تحس باهلها بس ف نفس الوقت تبقي شيك عشان ترضى مامتها وبقي شكلها مشرف ..
ليه دايما بيكون العبء على طفل واحد بس ..طفل مش بيشوف حنان اهله .. او بمعنى اصح هوا مش بيشوف غير توبيخهم ..
عارفين ان الطفل ده ممكن يطلع معقد .. اكيد بسبب تفريق العاملة بينه وبين اخواته ..

عارفي يوم ما اخو سهر مش عجبوا المجموع بتاعه فى اخر السنة قعد يعيط ومامته حضنته وطبطبت عليه ..قعدت تعيط معاه .. طبعا ده الولد .. ما ينفعش يزعل من حاجة لازم كل حاجة تكون كاملة بالنسباله ...ولما سهر جابت مجموع مش كويس وبخوها جداا .. وانتى مش بتذاكرى وانتى مش بتعملى اللى عليكى وبيشيلوها الذنب .. مع ان هما السبب .. سهر كانت بتعيط ليل ونهار لانها عمرها ما حست بالامان ف بيتها .. ولا حست بحنان الام .. ولا خوف الاب ..

عارفين لما طلبت لبس للعيد .. بنت ومن حقها تحس بفرحة العيد ف الهدوم الجديدة .. مامتها قالت لها بعد العيد هجيبلك هدوم وعملت حجتها ان المحلات منزلتش حاجة ...
عارفين لما الطفل ما يحس بالامان ولا الحنان بيعمل ايه ؟؟
اكيد عارفين .. لان اى واحدة بترتبط وتكلم واحد من ورا اهلها .. اول حاجة بتقولها انا مالقتش الامان ف بيت اهلى .. دورت على الامان مع واحد تانى ..

عارفين احساس البنت لما يكون جواها كلام كتير اووى ؟.. بس للاسف مش هتعرف تتكلم وتقول اللى جواها ..

عارفين لما تشتاق لحضن والدتها .. عارفين لما تشتاق لخوف باباها عليها... لما تحس انها عايزة تحس بالامان .. لما تحس ان المجتمع رافضها .. كل ده بيدور ف دماغ اى بنت مش شايفة الامان ف اهلها ..

شايفة انها مهما عملت عشان ترضى اهلها .. عمرهم ما هيحسوا بيها ..
شايفة ان اخواتها بياخدوا كل الحنان .. طبعا الشااب لانه ولد .. والصغيرة لانها اخر العنقود .. غير كدة بيكون حاجة اضافية ف البيت ..
مجرد طفل ف البيت .. مالوش حقوق .. بس عليه واجبات كتير .

تفتكروا الغلط غلط مين .. ..
غلطت سهر لانها ما اتكلمتش ؟؟.. ولا غلطة اخواتها .. ولا غلطة الاهل ؟؟؟ ... ولا غلطة المجتمع اللى اوهمنا ان الشاب هوا اللى ليه حق انه يعيش ف وسط حنان الاهل ودلعهم .. وكل ده بحجة انه الولد الوحيد .. هيا مش البنت زى الولد ؟؟

للاسف مجتمع متخلف ...


الكلام ده مش للتعميم.. فى شباب بيتظلموا بردو من اهلهم .. بس بطلة القصة النهاردة هيا اللى اتظلمت من المجتمع ..
التجربة دى موجودة ف مجتمعنا وفى تجارب تانية كتير موجودة .. بس مش معنى كدة ان ااننا بنقول ان كل الناس كدة...

على فكرة القصة دى حقيقية بس ما ينفعش نذكر الاسامى الحقيقية ..
ودى كانت التجربة اللى انا شوفتها كتير ف الواقع ..

بس الحمدلله بطلة قصتنا قدرت تتغلب على كل مشاكلها لان اخوها هوا اللى وقف معاها ... ودى كانت غلطة اهلها ..

وانا بطلب طلب من كل اللى يشوف الموضوع .. انه يدعى لاخويا علشان هو فى 3 ثانوى السنة دى


بقلم \ سلمى حلمى ..

الى اللقاء مع تجربة اخرى من تجاربنا فى الحياة ...